Koor

Koor

Diamantveld se skoolkore het geen bekendstelling nodig nie en onder die bekwame leiding van mev. Esther Ford, het die kore oor jare sterstatus bereik.

Die Prestigekoor het in 2003 vanuit die skoolkoor tot stand gekom. Dit was ’n veel kleiner koor en hulle het die skool met groot sukses by nasionale kompetisies verteenwoordig. Onder andere het hulle hulself in 2009 op UNISA se ererol geplaas met ‘n prestasie van 91% in die gevorderde UNISA kooreksamen.

Die skool het in 2009 van mev. Ford afskeid geneem en mev. Anne Solomon het aan die begin van 2010 die leisels oorgeneem. Mev. Solomon het jare ondervinding as koorleidster. Sy kom uit 'n baie musikale familie en het geen bekendstelling onder musiekliefhebbers nodig nie.

Die jaarlikse Diamantveld-koorfees is ‘n instelling in die Noord-Kaap en ‘n hoogtepunt op die kultuurkalender in Kimberley. Vanjaar vind die koorfees op 23, 24 en 25 Augustus plaas. Mathys Roets tree op 25 Augustus as gaskunstenaar op. In 2010 was Rina Hugo en Emile Minnie ('n oudleerling) die gaskunstenaars.

Die Paasuitvoering is ook 'n gevestigde instelling op die kalender en 'n pragtige uitvoering word jaarliks in die Katedraal gehou.

MUSIEK

Musiek is tot in 2009 as vak aangebied. Tans word musiekleerders privaat by die Kimberley Akademie vir Musiek onderrig. Daar is meer as 30 Diamantveld leerders wat musiek neem en die instrumente wat hulle bespeel, wissel van die gewilde klavier en viool tot verskeie tipes fluite, dromme, kitaar, trompet en klarinet.

Diamantveld se musiekleerders het oor al die jare puik presteer en baie van hulle se name pryk op UNISA se ererol. Verskeie Diamantveld leerders het ook die afgelope dekade in die Nasionale Jeugorkes gespeel.

In 2009 het vyf leerders die UNISA graad 7 klaviereksamen gespeel. Twee van hulle het met lof geslaag en twee met eervolle vermelding. Een leerder het haar blokfluiteksamen met 93% geslaag.

Diamantveld se skoolkore onder die bekwame leiding van Mev. Magdel Botha.
Diamantveld koor tydens die jaarlikse kerssangdiens.